Við viljum flest ná árangri og notum mismunandi leiðir til þess. Eitthvað sem flestir virðast vera sammála um er að ef þú veist ekki hvert þú ert að fara, þá kemstu líklegast ekki þangað.
Því setur fólk sér yfirleitt markmið ef það ætlar að ná einhverjum árangri – hvort sem að það gerir það huglægt, með yfirlýsingum eða skriflega…eða best af öllu þá sameinar það allt þrennt.
Meira að segja til þess að komast í frí þá verðum við að setja okkur markmið, móta það og vinna að því að gera það að raunveruleika. En hvernig getum við gert okkar besta til að tryggja að við náum markmiðunum okkar, sama hver þau eru?
Ein góð leið er að sjá hvað þeir sem hafa náð árangri gerðu til að ná sínum markmiðum og með hvaða vissu, öryggi, áræðni og metnaði þau settu sér þessi markmið.
Það eru fáir sem hafa sigrað jafn víðan völl eins og hann Arnold Schwarzenegger. Hvað sem fólki finnst um hann, þá er þetta maður sem sigraði allt sem hægt var að sigra í vaxtaræktarheiminum, sigraði svo Hollywood, sigraði næst viðskiptaheiminn og síðast en ekki síst þá sigraði hann í pólitík þegar hann var kosinn fylkisstjóri Kaliforníu – í fylki og landi sem hann fæddist ekki í.
Það er því einkar fróðlegt að sjá viðtal við Schwarzenegger frá árinu 1982 eftir fyrstu stórmynd hans Conan the Barbarian. Takið eftir því að hann er strax með það á hreinu að hann mun verða jafn frægur og Clint Eastwood. Fólk hló að honum eftir þetta viðtal – en hann sýndi og sannaði að svona ákveðni, svona markmiðasetningar og svona metnaður er það sem leiðir til árangurs: