Matvöruverslun í Kópavogi hefur selt fíkniefni um langt skeið. Þetta hefur fréttastofa Menn.is eftir – frá fjölda heimildarmanna sem ekki vilja láta nafns síns getið. Söluverðmæti efnanna er sagt nema fleiri hundruðum þúsunda á viku og telja heimildarmenn að salan hafi staðið yfir í meira en áratug. Íbúum í nágrenni verslunarinnar er brugðið og segja þeir að verslunin hafi haft gott orð á sér.
„Þetta er bara hverfisbúðin okkar,“ segir Níels Tyrfingsson, íbúi í hverfinu. „Þetta er kaupmaðurinn á horninu. Gott fólk sem þarna vinnur, eða svo hélt maður. Ég hef aldrei orðið var við neitt misjafnt þarna þannig að maður er eiginlega bara í sjokki.“
Lögregla verst frétta af málinu en fíkniefnin sem um ræðir eru sígarettur og munntóbak. Að sögn heimildarmanns hefur sá háttur verið hafður á að fíkniefnaneytendur þurfi að biðja sérstaklega um efnin. Þau séu ekki höfð sjáanleg í versluninni, heldur geymd á bak við afgreiðsluborðið. Þau séu þó afgreidd öllum þeim sem biðja um þau, hafi þeir náð tilskyldum aldri.
„Það er ótrúlegt að hugsa til þess að þessi viðskipti hafi átt sér stað innan um venjulega matvöru,“ segir Fjóla Löve, fastagestur í versluninni. „Ég hef kannski verið í sakleysi mínu að kaupa lambahrygg á meðan maðurinn við hliðina á mér var að kaupa eiturlyf. Svo skilst mér að þetta hafi viðgengist mjög lengi og lögreglan gerir ekkert. Þetta er til skammar.“
Sígarettur og munntóbak innihalda fjölda eiturefna sem geta valdið veikindum og dauða, þar á meðal arsenik, blásýrusalt, blý, taugaeitur, tjöru og nikótín. Árlega deyja um 140 Íslendingar af völdum krabbameina sem rekja má til tóbaksneyslu.
Skaðsemi tóbaks hefur lengi verið öllum ljós. Samt notum við það ennþá. Við vitum betur. Fáðu nánari upplýsingar um skaðsemi tóbaks á Mottumars.is.
Matvöruverslun í Kópavogi seldi fíkniefni – „Málið er litið mjög alvarlegum augum.“
