Birgir Ómar Jónsson lenti í háskalegu atviki þegar hann var 14 ára gamall. Hann var að taka í sundur vítistertu – þegar hún sprakk framan í hann.
Birgir Gat ekki opnað augun í viku og var heppinn að halda sjóninni.
„Ég slapp virkilega vel og verð alltaf þakklátur fyrir það.“ segir hann. „Það eru ekki allir sem eru svona heppnir, því miður. Ég hef nú að vísu ekki skánað mikið í framan eftir þetta en þó aðeins.“
Atvikið óx úr uppátækjum hans og vinar hans:
„Við vorum tveir vinir að taka vítistertu í sundur og ætluðum að nota duftið úr henni til að búa til sprengjur, en tertan sprakk í höndunum á mér og í andlitið á mér.“
Hann var heppinn að hitta hjúkrunarfræðing strax í kjölfarið á slysinu.
„Ef það hefði ekki verið hjúkrunarfræðingur inni á þessari vídeóleigu sem setti ískalt vatn í augun á mér allan tímann á meðan við biðum eftir sjúkrabílnum þá væri ég líklega blindur í dag, sögðu læknarnir. Það munaði mjög litlu.“
Reynslan er ein sú sársaukafyllsta sem hann hefur upplifað á ævinni.
„Þetta var rosalega sárt og ég gat ekki opnað augun. Ég stóð fyrir utan vídeóleiguna og var að reyna að rífa augun á mér upp með puttunum. Ég gerði mér ekki grein fyrir því að þetta væri opið sár.“
Hér má sjá myndina af Birgi:
„Gleðilegt ár, munið að fara varlega, og ekki gleyma hlífðargleraugunum.“, segir Birgir að lokum.