Góð tónlist
Hljómsveitin Onion the Man samanstendur af fjórum bandarískum tónlistarmönnum frá Portland, Oregon. Þann 8. júní síðastliðinn gaf hljómsveitin út myndband við lagið Footy Beef (Do It) og hefur myndbandið, sem þykir býsna sýrt, vakið mikla lukku meðal áhorfenda.
Lagið rataði t.a.m. inn á þráðinn Listen to This á vefsíðunni sívinsælu Reddit þar sem flestir notendur tjáðu ánægju sína með myndbandið, þar á meðal einn sem spurði hvort að myndbandinu hafi verið leikstýrt af framleiðendum Sesam Street—á meðan þeir voru freðnir?
Áhugasamir geta fylgst með tónlist Onion the Man á Spotify. Sveitin gaf út EP plötuna Manalili árið 2016 og plötuna Dolphin Man árið 2017 (sjá hér að neðan). Þá er lagið Footy Beef (Do It) að finna á síðarnefndri plötu.