Lagið Mask Off eftir Future er að finna á samnefndri plötu (Future) sem kom út fyrr á árinu (febrúar 2017). Í þessum rituðu orðum situr lagið í 5. sæti Billboard Hot 100 listans og er jafnframt talið vinsælasta lag tónlistarmannsins til þessa.
Lagið pródúseraði Metro Boomin og inniheldur sampl frá laginu Prison Song eftir Tommy Butler (sjá hér fyrir neðan) – og er þetta ekki í fyrsta skiptið sem samplið hljómar í rapplagi.
Tommy Butler – The Prison Song (1978)
Prison Song samdi bandaríska leikskáldið Tommy Butler árið 1978 fyrir leiksýninguna Selma, en leikritið fjallar um baráttu Martin Luther King Jr. fyrir auknum rétti þeldökkra í Bandaríkjunum. Þó svo að sýningin sjálf hafi ekki vakið mikla lukku hefur tónlistin sem fylgdi sýningunni lifað ágætis lífi; platan Selma er nokkuð þekkt á meðal pródúsenta í rappi sem notast við sömpl.
Nánar: https://noisey.vice.com/en_uk/…
Prison Song var fyrst notað árið 2000 í laginu Top Dogz með sænsku hljómsveitinni Looptroop (Embee, sem pródúseraði lagið, samplaði einnig lagið Underground eftir reggí sveitina The Upsetters í Top Dogz).
Looptroop feat. Petter – Top Dogz (2000)
Fimm árum seinna var það svo tvíeykið Felt (Slug og Murs ásamt pródúsentnum Ant) sem samplaði Prison Song í laginu Woman Tonight (lagið er að finna á plötunni Felt, Vol. 2: A Tribute to Lisa Bonet) árið 2005.
Felt – Woman Tonight (2005)
Árið 2012 lék svo sænski rapparinn Stor eftir samlöndum sínum í Looptroop og notaði samplið í laginu Mitt Folk. Stor heitir réttu nafni Ulises Infante Azocar og skartaði fyrsta platan hans, Nya Skolans Ledare (2009), meðal annars rapparanum Promoe úr hljómsveitinni Looptroop.
Stor – Mitt Folk (2012)
Ári seinna gaf svo pólski rapparinn Keke út lagið Jeden kraj sem inniheldur sama sampl. Lagið er að finna á plötunni Takie Rzeczy sem Keke gaf út árið 2013 en rapparinn hefur verið virkur frá lok tíunda áratugsins.
KęKę – Jeden kraj (2013)
Frá útgáfu Mask Off hafa aðdáendur lagsins gert sér leik úr því að endurspila flautukafla lagsins með miklum tilþrifum. Hér fyrir neðan má sjá brot af því besta:
Þess má einnig geta að myndband við Mask Off er væntanlegt á næstu dögum en í gær (3. maí) sendi Future frá sér stiklu úr myndbandinu á Youtube.