Fréttir
Bandaríska söngkonan Kali Uchis hefur getið sér gott orð síðastliðin ár. Uchis, sem er ættuð frá Kólumbíu, vakti fyrst athygli árið 2012 með útgáfu mixteipsins Drunken Babble. Síðan þá hefur söngkonan gefið út stuttskífuna Por Vida (2015) og hljóðversplötuna Isolation (2018). Lag hennar After the Storm hefur t.d. verið spilað rúmlega 45 milljón sinnum á Spotify.
Nýverið leit Uchis við í Like A Version, sem er vikulegur liður á áströlsku útvarpsstöðinni Triple J, þar sem bæði ástralskir og alþjóðlegir listamenn koma fram í beinni í hljóðveri stöðvarinnar og flytja eitt lag eftir sjálfan sig og eina ábreiðu, yfirleitt.
Uchis flutti lagið Venus as a Boy eftir íslensku söngkonuna Björk (sjá hér að ofan) og eru flestir á því að hún hafi gert það með prýði. Líkt og einn hlustandinn á Youtube orðaði það: „Þetta er mín fullnæging.“ Lagið Venus as a Boy er að finna á plötunni Debut sem kom út árið 1993.
Hérer svo lagið Hyperballad eftir Björk í flutningi Robyn.