Það hefur verið lítið um geitunga á Íslandi það sem af er sumri. Guðmundur Óli Scheving, meindýraeyðir hjá Ráðtaki, segir í samtali við Fréttablaðið í dag að veðrið í upphafi sumars hafi hjálpað til við að halda þeim í skefjum.
„Það var rosalega lítið um þá í fyrra og mér sýnist þeir bara nánast ekkert vera á ferðinni núna. Þeir eru búnir að vera að búa sér til bú og þótt þau séu kannski lítil þá eru þeir komnir af stað. Þeir eru samt ósköp ræfilslegir þeir fáu sem eru á ferli,“ segir Guðmundur í Fréttablaðinu.
Það má þó búast við að geitungarnir muni angra Íslendinga eitthvað í sumar og þá sérstaklega ef veðrið fer að skána. Guðmundur spáir því að það komi hvellur í ágústbyrjun og eitthvað ónæði verði af geitungunum fyrir það.