Í gær fluttu systkynin Bó og Svala inn í fallega húsið og verða aðalpersónur Keeping Up With the Kattarshians á næstunni. Eins og sjá má hefur húsið tekið breytingum, nú er greinilegt að unglingar hafa lagt undir sig húsið. Þau eru tæplega fimm mánaða og eru tilbúin að heilla áhorfendur upp úr skónum.
Þar sem þau eru dálítið eldri en hinir kettlingarnir sem hafa verið í húsinu erum við búin að opna upp á háaloft og þá fengu þau líka aðeins unglingalegri og stærri rúm.
Hér er hægt að fylgjast með þættinum.
Bó er langur og mjór með grásprengdan feld. Það er oft kallað „smokey“, eða svart reyklitað. Hann er háfættur með langa rófu.Ef Bó væri alþingismaður væri hann sennilega alltaf uppi í ræðustól og hefði skoðanir á öllu. Hann mjálmar nefnilega hátt og mikið og malar líka stanslaust. Hann væri sennilega líka duglegur að skella sér á B5 eftir vinnu eða í heimsókn til afa og ömmu hverja helgi þar sem hann er mjög félagslyndur.
Svala, systir hans, er fíngerðari og frekar ólík bróður sínum þó að þau séu vissulega bæði svört. Hún er í hvítum sokkum, með hvítan held á öllum loppunum. Bringan er líka hvít.Svala er mun rólegri en bróðir hennar og hefur sig ekki jafn mikið frammi. Hún er þó oftast til í að leika við hann og þá er svo sannarlega kátt í höllinni.
Keeping Up With The Kattarshians er framleitt af Skoti og Sagafilm. Verkefnið er unnið í samvinnu við Kattavinafélag Íslands, með fullri vitneskju og samþykki Matvælastofnunar, dýraeftirlitsmanns suðvesturumdæmis og dýralæknis gæludýra og dýravelferðar.
Margir af köttunum sem koma í Kattholt eru týndir heimiliskettir, flækingskettir og læður með kettlinga. Þú getur tekið þátt í þessu starfinu með því að gerast félagi í Kattavinafélagi Íslands. Árgjaldið er kr. 3000. Hægt að skrá sig á kattholt.is
Sjúkrasjóðurinn Nótt var stofnaður árið 2006 af Kattavinafélagi Íslands. Sjúkrasjóðurinn er notaður til að kosta læknisaðgerðir og hjúkrun á slösuðum kisum sem enginn vill kannast við.
Það má styrkja sjóðinn með því að leggja inn á reikning:
Nr. 0113-05-065452
Kt. 550378-0199