Um hvað snýst málið?
Tíu manns hafa gefið kost á sér í forsetakosningunum í sumar. Ólafur Ragnar Grímsson lýsti yfir í nýársávarpi sínu að hann ætli ekki að gefa kost á sér á ný.
Hvað er búið að gerast?
Rithöfundurinn Þorgrímur Þráinsson gaf kost á sér í nóvember og Youtube-stjarnan Ari Jósepsson var þá þegar búinn að tilkynna framboð. Athafnamaðurinn Ástþór Magnússon tilkynnti svo um framboð sitt á dögunum rétt eins og Elísabet Jökulsdóttir rithöfundur.
Þá hafa Hildur Þórðardóttir þjóðfræðingur og rithöfundur, Sturla Jónsson vörubílstjóri, Heimir Örn Hólmarsson rafmagnstæknifræðingur og Vigfús Bjarni Albertsson sjúkrahúsprestur gefið kost á sér.
Í vikunni gáfu svo Halla Tómasdóttir athafnakona og Bæring Ólafsson, fyrrverandi forstjóri og framkvæmdastjóri hjá Coca Cola International kost á sér.
Hvað gerist næst?
Kosningarnar fara fram þann 25. júní og forsetaframbjóðendur þurfa að tilkynna um framboð fimm vikum áður, eða 21. maí.
Örskýringar eru 200 orða fréttaskýringar Nútímans um mál sem mikið er fjallað um. Sendu okkur póst ef þú ert með hugmynd að örskýringu.